கூன் விழுந்த உடம்பு
பஞ்சடர்ந்த தலை
பழுது பட்ட பார்வை
அழுக்கடைந்த
வெள்ளைச் சேலை
அதுதான் அம்மாயி
அந்த மலைக்கோயில்
அடிவார கடைத்தெருவில்
அங்குமிங்கும் அலைந்து
காண்போரிடமெல்லாம்
கேட்டுக்கொண்டிருந்தாள்
தன் மகனையும்
தன் மருமகளையும்
பார்த்தீர்களா...? என்று
நைய்ந்த வார்த்தைகளில்...
அலைபாயும் கூட்டம்
ஆண்டவனைத் தரிசிக்க
தேங்காய் பழம் தட்டுடன்
அந்த மலைக்கோயில்
படிகட்டுகளில் ஏறிக்கொண்டு...
பதில் சொல்வாரில்லை இவளுக்கு.
விரட்டும் உச்சி வெயில்
வறட்டுத் தாகம்
மயங்கும் தருணம்
அம்மாயியை தாங்கிப் பிடித்து
அணைத்துக்கொண்டு
அழைத்துச் சென்றாள்
அங்கே வந்த செல்லம்மாள்
அவளைப்போலவே
அழுக்கடைந்த கிழிந்த சேலை
பஞ்சடைந்த வெள்ளைத்தலை
பார்வை பழுதில்லை
கூன் முதுகில் விழவில்லை
தெருக் கடைசியில் இருந்த
மரத்தடி திண்டு கல்மேடையில்
அம்மாயியை அமரச்செய்து
பாத்திரத்தில் இருந்த கஞ்சியை
பருகக் கொடுத்தாள் செல்லம்மாள்.
அங்கே இருந்தார்கள்
இவர்களைப் போன்று
மூன்று வயதான பெண்கள்
இரண்டு வயதான ஆண்கள்.
“ஏன் தாயி...
உன் மகன் கூட வந்திருப்பிய....?
கோயிலுக்குப் போகலாமுன்னு
கூட்டியாந்திருப்பானே....
பஸ்சாண்டுல இறங்குனதும்
காணாமப் போயிருப்பானே
இப்படித்தான் நானும் இவங்களும்
இங்கனக்க கிடந்து அல்லாடுறோம்
அவனுங்க வரமாட்டானுங்க
நம்மள காணாமப் போடத்தான
கூட்டியாரானுங்க..பாவிப்பயலுக
பெத்த வயிறு நெனைச்சா
பத்திக்கிட்டு எரியுது....
இங்க நல்லாத்தாம் இருக்கும்
கொசுவெல்லாம் கடிக்காது..
இரத்தம் சுண்டிப்போச்சே நமக்கு.
குளிருதான் அடிக்கும் தாயி.
போன மார்கழியில
நம்ம ஆளுக இரண்டு
பாவம்...போய்ச் சேர்ந்துச்சுக....
சோத்துக்கும் பஞ்சமில்ல...
கீழ் கோயில்ல மொட்ட போட்டு
சோறாக்கிப் போடுவாக.....”
புலம்பிக்கொண்டிருந்தாள்
செல்லம்மாள்.
அப்போது அங்கே வந்த
ஒரு கிழட்டு குரங்கு
இரண்டு வாழைப் பழங்களை
செல்லம்மாளிடம் நீட்டியது
அதிலோன்றை
அம்மாயிடம் கொடுத்த
செல்லம்மாள் சொன்னாள்
அந்தக் குரங்கிடம்...
“என்ன பார்க்கிற..
இவளும் நம்மளைப் போல
அநாதை ஜென்மம்தான்” என்று.
அழுகையை அடக்கிக் கொண்டு
வடியும் கண்ணீருடன்
மகனையும் பேரனையும் நினைத்து
மரத்தடியில் சாய்ந்தாள் அம்மாயி.
அந்தக் கிழட்டு குரங்கும்
அவள் மடிமீது தலை வைத்து
அவள் முகத்தை
ஏறிட்டுப் பார்த்தது.....
வாழ்க்கை இங்கே மங்காத்தா..?
உள்ளே-வெளியே விளையாட்டா..?
வலைதளங்களில் பகிருங்கள்....நன்றி!!!
| Follow @PARITHITAMIL |